The Spider குற்ற சக்கரவர்த்தி ஸ்பைடர்

பேட்மேன் தோன்றும் மர்மக்கொள்ளையன்

2010-12-08T21:09:00.000+05:30

நண்பர்களே,

நெடுநாட்களுக்கு பின்னர் நேற்று தான் திடீரென்று பதிவிடும் எண்ணம் வந்தது. அதற்க்கு காரணம் நேற்று மறுபடியும் பேட்மெனின் தி டார்க் நைட் படத்தை தமிழில் பார்த்தேன். ஒவ்வொரு முறை அந்த படத்தை பார்க்கும்போதும் பேட்மென் பற்றிய பதிவொன்றை இடவேண்டும் என்று நினைப்பேன், பின்னர் ஏதோ சில காரணங்களால் அந்த பதிவு தள்ளிப்போய்விடும். ஆனால் இந்த முறை அப்படி செய்யாமல் பதிவை இடவேண்டும் என்ற உந்துதல் அதிகரித்ததால் தான் இந்த பதிவு.

ஆகையால் தமிழில் வந்த பேட்மென் கதைகள் பற்றி தேடுகையில் (திகில் காமிக்ஸ் லயன் காமிக்ஸ் நீங்கலாக) எனக்கு தோன்றியது இந்த தேவியின் கண்மணி காமிக்ஸ் தான். ஆகையால் அந்த காமிக்ஸில் வந்த ஒரு கதையை உங்களுக்கு இங்கே வழங்குகிறேன். இந்த கதையின் பக்கங்களை கணினிப்படுதி தந்த அருமை நண்பருக்கு நன்றிகள்.

என்ன, நம்முடைய திகில் காமிக்ஸில் படித்த ஜோக்கரின் ஆரம்ப கால வாழ்க்கைக்கும் இந்த கதைக்கும் பல மாறுதல்கள் இருக்கிறதே என்று பார்க்கிறீர்களா? இது அமெரிக்காவில் வரும் காமிக்ஸ்களில் சகஜம். ஒரு எடிட்டர் மாறி வேறு ஒருவர் வரும்போது அவர்கள் இதுபோல சின்ன சின்ன அட்ஜஸ்ட்மென்ட் செய்வது வாடிக்கை.

அடுத்து வேறொரு காமிக்ஸ் கதையுடன் வருகிறேன்.

ஸ்பைடர் - கிங் ஆப் குரூக்ஸ்

2010-04-14T20:52:00.000+05:30

நண்பர்களே,

சித்திரை முதல் நாள் நல்வாழ்த்துக்கள். பல நாட்களாக நான் வாங்க இருந்த புத்தகம் ஒன்றினை நண்பர் ஒருவர் எனக்கு சென்ற வாரம் பரிசளித்தார். அதன் விவரங்களை இந்த பதிவில் அளித்தது உங்களை எல்லாம் வாங்க தூண்டுகிறேன். ஆம், அத்துணை சிறப்பு வாய்ந்த புத்தகமே அது. கிங் ஆப் குரூக்ஸ் என்ற புத்தகம் அமெரிக்காவின் டைட்டன் புக்ஸ் மூலம் வந்துள்ளது. இதோ அந்த அற்புதமான புத்தகத்தின் விவரங்கள்:

இதுதான் அந்த புத்தகத்தின் ஜாக்கெட் கவர். அதன் அட்டையை மட்டும் பார்க்க விரும்பினால், இதோ, அதுவும் உங்களின் பார்வைக்கு:

புத்தகம் அற்புதமாக பிரின்ட் செய்யப்பட்டு உள்ளது. அதனால் வாங்க மறுக்காதீர்கள். அதன் முதல் பக்கம்:

இந்த புத்தகத்தில் மொத்தம் மூன்று கதைகள் உள்ளன: இதோ அதன் விவரங்கள்:

இந்த மூன்று கதைகளுமே தமிழில் வந்துள்ளன:

புத்தகத்தை மறக்காமல் வாங்கி படியுங்கள் நண்பர்களே. மிஸ் செய்யக் கூடாத புத்தகம் இது.

பழைய காமிக்ஸ் புத்தக விற்பனை - ஒரு விவாதம்

2010-03-02T16:11:00.000+05:30

நண்பர்களே,

நெடுநாட்களாக பதிவிடாமல் இருந்தமைக்கு மன்னிக்க. சில பேர் மட்டும் என்னிடம் "மன்னிக்க மனமில்லை, மன்னிக்க" என்று கூட சொல்லலாம். என்ன செய்வது சாமி, நம்ம பொழப்பு அப்படி ஆகி விட்டது. அதனால் பழைய விஷயங்களை மறந்து விட்டு பதிவுக்கு செல்வோம். இனிமேல் முடிந்த அளவிற்கு என்னால் இயன்ற ஸ்பைடர் மற்றும் இரும்புக்கை மாயாவி கதைகளை உங்களுக்கு வழங்க முயற்சி செய்கிறேன். அதனைப் போலவே எனக்கு மிகவும் பிடித்தமான கோகுலம் மற்றும் பூந்தளிர் புத்தகங்களையும் சற்று அலசுவோம். என்ன சரிதானே?

இந்த பதிவு இனிமேல் வரப்போகும் அனைத்து ரெகுலர் பதிவுகளுக்கு ஒரு முன்னோடியாக இருக்கட்டும்.அதற்க்கு முன்பு இந்த செய்தித்தாளில் வந்த செய்தியை படியுங்கள்.

இதில் நான் கவனித்த விஷயம் ஒன்று: இதனை வாங்கியவர் காமிக்ஸ் பிரியர் என்று குறிப்பிடப்பட்டு இருந்தது. நான் கூட எங்கே நம்ம காமிக்ஸ் பிரியரோ என்று நினைத்தேன். அவருக்கு மின்னஞ்சல் கூட அனுப்பினேன். ஆனால் அவர் இல்லை என்று நினைக்கிறேன்.

அந்த விஷயத்தை விடுங்கள். ரொம்பவும் முக்கியமான விஷயம் என்னவெனில் இந்த புத்தக விற்பனை நடந்த மூன்று நாட்களிலேயே பேட்மேன் காமிக்ஸின் முதல் இதழ் ஐந்து கோடி ரூபாய்களுக்கு விற்கப்பட்டு மற்றுமொரு சாதனையை புரிந்தது. நமது ஊரில் மட்டும் அப்படி பழைய காமிக்ஸ் புத்தகங்களை விற்றால் ஏதோ ராணுவ ரகசியத்தை விற்கிற மாதிரி பேசுகிறார்கள். இவர்களுக்கு என்ன தெரியும் ஒரு பழைய புத்தகத்தை பேணிப்பாதுகாக்கிற வேலை என்பது ஏதோ சாதாரண விஷயம் இல்லை என்பது.

பழைய முத்து காமிக்ஸ், லயன் காமிக்ஸ், அசோக் மேத்தா காமிக்ஸ் போன்றவற்றின் அட்டைப்படங்கள் மிகவும் சென்சிடிவ் ஆனவை. அவை எல்லாம் இப்போது கை பட்டாலே உடைந்து போய் விடும் அவற்றை காப்பது என்பது குதிரை கொம்பு போல. அவற்றின் மீது டேப் ஓட்ட வேண்டும், பிளாஸ்டிக் கவரில் போட்டு பாதுகாக்க வேண்டும், என்று பல விஷயங்கள் உள்ளன. அதுவில்லாமல் இவற்றை யாரும் மனமுவந்து விற்பது இல்லை. ஒவ்வொருவரும் ஏதேனும் ஒரு கடினமான சூழ்நிலை வரும்போதே விற்கிறார்கள். அதனால் விற்பவர்களை யாரும் குறை சொல்ல வேண்டாம். உங்களால் வாங்க முடியவில்லை என்றால் விட்டு விடலாம், உங்களை யாரும் வற்புறுத்துவது கிடையாதே?

இப்படி எல்லாம் என்னுடைய நண்பர்கள் சில பேர் என்னிடம் சொல்கிறார்கள். ஏதோ அவர்களின் மனக்குறையை அவர்கள் என்னிடம் சொல்லி தீர்த்துக் கொள்கிறார்கள். என்ன செய்வது?

ஆனால், புத்தக விற்பனையை வெறுக்கும் சிலர் "இப்படி ஒரு ருபாய், ரெண்டு ரூபாய்க்கு கிடைத்த புத்தகத்தை எல்லாம் ஐநூறு, ஆயிரம் என்று விற்பது அநியாயம்" என்று கூறுவதோடில்லாமல் விற்கும் சில நண்பர்களை பற்றி அவதூறாகவும் பேசுகிறார்கள். சிலர் இந்த காமிக்ஸ் விற்பனையை ஒரு கலையாகவே செய்வதாகவும் தகவல். அதனால் இரண்டு பக்கங்களிலும் கூர்ந்து கவனித்தால், அவசியம் என்றால் வாங்குங்கள், இல்லை என்றால் விட்டு விடுங்கள் என்பதே சரியான தீர்வாக தெரிகிறது.

இதனை பற்றிய உங்கள் கருத்தை தெரிவியுங்கள்.

தீபாவளி நல்வாழ்த்துக்கள் - கோகுலம் ஒரு டீசர்

2009-10-17T17:24:00.000+05:30

நண்பர்களே,

அனைவருக்கும் என்னுடைய தீபாவளி நல்வாழ்த்துக்கள். அடுத்த வாரம் தான் இந்த பதிவை இட எண்ணி இருந்தேன். ஆனாலும் காமிக்ஸ் நண்பர்கள் அனைவருக்கும் தீபாவளி ந்நாளில் வாழ்த்துக்களை தெரிவிக்க எண்ணி இந்த டீசர் பதிவை இடுகிறேன். முழுமையான பதிவு மேலும் பல ஸ்கான்களுடன் விரைவில் வரும்.

நண்பர்கள் அனைவரும் முதன் முதலில் படித்த காமிக்ஸ் பற்றி கேட்டால் சற்று தடுமாறுவார்கள். கண்டிப்பாக முத்து காமிக்ஸ்/ராணி காமிக்ஸ்/லயன் காமிக்ஸ்/இதர.... இந்த லிஸ்ட்டில் இராது. சிலர் பூந்தளிர் முதலும், இன்னும் சிலர் முத்து வாரமலருடனும் கூட ஆரம்பித்து இருக்கலாம். அல்லது அம்புலிமாமா, பாலமித்ரா போன்றவற்றுடன் கூட இருக்கலாம். ஆனால் நான் முதன் முதலில் படிக்க ஆரம்பித்த (இதனை காமிக்ஸ் என்று வகைப் படுத்த இயலாததால்) சிறுவர் இலக்கிய இதழ் கோகுலம் ஆகும்.

நான் மேலே கூறியவற்றில் பல இதழ்கள் இப்போது வருவதில்லை. பூந்தளிர் நின்று விட்டது, பாலமித்ரா கூட. ஆனால் அம்புலிமாமா மற்றும் கோகுலம் போன்ற இதழ்கள் இப்போது கூட வந்து கொண்டு தான் இருக்கின்றன. நம்மை போன்ற பல வருட வாசகர்கள் இப்போதும் கூட சில சமயங்களில் அதனை வாங்கி விடுகின்றனர். வேறென்ன செய்ய? பழைய பழக்கங்கள் அத்தனை சுலபத்தில் விட்டு விலகுவதில்லையே? ஆனால் நம்மை ஒரு காலத்தில் மதி மயங்க செய்த அந்த செப்பிடு வித்தைகள் இப்போது இந்த புத்தகங்களில் இல்லை. சிறுவர்களுக்கு இந்த கதைகள் தான் பிடிக்கும், இது போன்ற சித்திரக்கதைகள் தான் பிடிக்கும் என்று இவர்களே நினைத்துக் கொண்டு இவர்களின் மனம் போன போக்கில் கதைகளை தரம் பிரிக்காமல் வெளியிட்டு இந்த புத்தகங்களில் மதிப்பை தாழ்த்திக் கொண்டு இருக்கின்றனர்.

ஆனால் முப்பத்தி எட்டு வருடங்களுக்கு முன்பு வந்த இந்த ஒரு விளம்பரம்தான் சிறுவர் புத்தக உலகை மாற்றிய ஒன்றாகும். ஆம், கோகுலம் இதழின் விளம்பரம் இது. கல்கி இதில் வந்தது. ஓவியர் மாருதி அவர்களின் தூரிகை வண்ணத்தில் சிறார்களின் மனதை கவரும் விதத்தில் இல்லாமல் பெற்றோர்களின் மனதை கவரும் விதத்தில் அமைந்த இந்த விளம்பரம் ஒரு மைல் கல் ஆகும்.

இந்த இதழுடன் வந்த குட்டி பரிசு என்ன என்பதை அடியேனுக்கு யாராவது தெரியப் படுத்தினால் அகம் மகிழ்வேன். இதனைப் போலவே மற்றும் பல விளம்பரங்களை கல்கி இதழில் கொடுத்து அதன் மீது ஆர்வத்தை தூண்டினார்கள்.

அடுத்த பதிவில் ஆரம்ப காலத்தில் வந்த கோகுலம் இதழ்களுடன் தற்போது வரும் கோகுலம் இதழ்களோடு ஒப்பிடுவதை செய்யாமல் கோகுலத்தினை நான்கு கால கட்டங்களில் பிரித்து ஆராய்வோம்.

அனைவருக்கும் மீண்டும் ஒருமுறை தீபாவளி நல்வாழ்த்துக்கள்.

The Spider ஸ்பைடர் லயன் காமிக்ஸ ஹீரோ

2009-09-03T18:47:00.000+05:30

நண்பர்களே,

வணக்கம் சாமி, வணக்கம். இது என்னுடைய முதல் பதிவு என்பதால் எனக்கு மிகவும் பிடித்த காமிக்ஸ் ஹீரோ ஆகிய ஸ்பைடர் பற்றிய பதிவை போட்டு ஆரம்பிக்கிறேன். தொடரும் பதிவுகள் அனைத்தும் நான் விரும்பி படித்த தமிழ் சிறுவர் பத்திரிகைகளை பற்றியே இருக்கும். இந்த பதிவு ஒரு சாம்பிள் மட்டுமே. முழுமையான பதிவு பின்னொரு நாளில் வெளிவரும்.

தமிழ் காமிக்ஸ் பற்றிய விழிப்புணர்வை ஏற்படுத்திய நண்பர் முத்து விசிறி அவர்களுக்கும், தமிழ் காமிக்ஸ் பற்றி ஒரு மாபெரும் மறுமலர்ச்சி கொண்டு வந்து பலரையும் பதிவர்களாக மாற்றி முழுமையான பதிவுகளை நமக்கு அறிமுகப்படுத்திய கிங் விஸ்வா அவர்களுக்கும் இந்த பதிவை சமர்ப்பணம் செய்கிறேன்.இப்போது வெளி நாட்டில் இருக்கும் இந்த இருவருக்கும் என்னுடைய நன்றிகள்.

ஸ்பைடர் பிரிட்டிஷ்காரர்களால் உருவாக்கப் பட்ட ஒரு கற்பனை காமிக்ஸ் பாத்திரம். முதன் முதலில் ஒரு சூப்பர் வில்லன் ஆக இருந்த ஸ்பைடர் பின்னாளில் மனம் திருந்தி ஒரு சூப்பர் ஹீரோ ஆக மாறி குற்றம் செய்பவர்களுக்கு எதிராக போராடி வருகிறான். ஸ்பைடர் பாத்திரத்தை உருவாக்கியவர் பெயர் டேட் கொவான் மற்றும் சித்திரங்களை வரைந்தவர் ரெக் பன்.ஸ்பைடர் தொடரில் மூன்றாவது கதை முதல் உள்ளே நுழைந்து கதை எழுத ஆரம்பித்தவர் உலகப் புகழ் பற்ற சூப்பர்மேன் பாத்திரத்தை உருவாகிய ஜெர்ரி சீகல். பின்னர் இவரே பெரும்பான்மையான ஸ்பைடர் தொடர்களுக்கு கதையை உருவாக்கியவர்.

முதன் முதலில் ஸ்பைடர் கதை இங்கிலாந்தில் வெளிவந்த லயன் என்னும் காமிக்ஸ் வார இதழில் 1965 ஆம் ஆண்டு வந்தது. நான்கு ஆண்டுகள் தொடர்ந்து வந்த இந்த தொடர் பின்னர் 1976 வல்க்கன் இதழில் ரீபிரிண்ட் செய்யப் பட்டது. நடுவில் லயன் மற்றும் பிலீட்வே குழும பத்திரிக்கைகளில் சிறப்பிதழ்களில் சிறு கதைகள் வேறு வந்தது. இதை தவிர பிலீட்வே சூப்பர் சீரிஸ் என்னும் மாத இதழ்களில் வேறு முழு நீள கதைகளாக வந்தது.

ஸ்பைடர் பல்வேறு உலக நாடுகளில் பல மொழிகளில் வெளிவந்தது உள்ளது. ஜெர்மனியில் கோப்ரா என்ற பெயரில் வந்து மிகவும் புகழ் பெற்றது. இந்தியா, ஸ்பெயின் , இத்தாலி, பிரான்ஸ் போன்ற நாடுகளில் வந்து சிறப்பாக வந்தது. ஸ்பைடர் தொடரை மீண்டும் உயிர்பிக்க பல முயற்சிகளின் எடுக்கப் பட்டன. ஆனால் இதில் யாரும் முழுமையான ஈடுபாட்டுடன் செய்யாததால் அவை எல்லாமே அனைவராலும் வெறுக்கப் பட்டன. சமீபத்தில் டைட்டன் நிறுவனத்தினரால் ஸ்பைடரின் முதல் மூன்று கதைகள் ஒரு தொகுப்பாக ஒரே புத்தகமாக கொண்டு வரப் பட்டது. இவை இந்தியாவிலும் கிடைக்கின்றன. படித்து மகிழுங்கள் நண்பர்களே.

ஸ்பைடர் முதன் முதலில் தோன்றியபோது அவன் யார், அவனுடைய பின்புலம் என்ன என்பது பற்றிய எந்த ஒரு தகவலும் கொடுக்கப் பட வில்லை. அதனால் அவனை பற்றிய எந்த ஒரு மேலதிக தகவலும் இல்லை. ஆனால் அவனுடைய ஒரே எண்ணம் : தன்னிகரில்லாத குற்ற சக்கரவர்த்தி ஆவதே. அதற்காக அவன் ஒரு படையை உருவாக்கினான். அதில் பலர் இருந்தாலும் குறிப்பிடும் படியான இருவர் : புரபெஸ்ஸர் பெல்ஹாம் மற்றும் ராய் ஆர்டினி ஆகும். இந்த இருவருமே ஸ்பைடருடன் பல கதைகளில் தோன்றுகின்றனன்ர்.

ஸ்பைடருக்கு என்று சில பல வித்தியாசமான ஆயுதங்கள் உள்ளன. உதாரணமாக எக்கு போன்ற உறுதியான இழைகளை கக்கும் வலை துப்பாக்கி, மயக்க வைக்கும் வாயுத் துப்பாக்கி போன்றவை மிகவும் புகழ் பெற்றவை. இவை ஸ்பைடருக்கு எந்த ஒரு பாதிப்பையும் ஏற்படுத்தாது என்பது இவற்றின் சிறப்பு அம்சமாகும். இதை தவிர ஹெலி கார் என்று ஒரு பறக்கும் கார் தான் ஸ்பைடரின் வாகனம் ஆகும். இந்த ஹெலி கார் ஸ்பைடரின் குரலுக்கு மட்டுமே கட்டுப்பட்டு செயல் படும் என்பதும் ஒரு விந்தையான விஷயம். ஸ்காட்லாந்தில் உள்ள ஒரு பழைய கோட்டையின் ஒவ்வொரு கற்களாக பெயர்த்து எடுத்து வந்து கட்டப் பட்ட ஒரு மாபெரும் மாளிகையே ஸ்பைடரின் இருப்பிடம் ஆகும். இந்த மாளிகை எதிரிகள் யாருக்கும் தெரியாத ஒன்றாகும். இந்த மாளிகையில் பல நுட்பமான இயந்திரத் பொறிகள் பொருத்தப் பட்டு இருக்கும்.

குற்ற உலகில் ஸ்பைடர் சந்தித்த எதிரிகள்.......... அப்பப்பா எத்தனை பயங்கரமானவர்கள் மற்றும் எத்தனை வித்தியாசமானவர்கள். கண்ணாடி மனிதன், மிஸ்டர் மர்மம், இயந்திர பொம்மைகளின் பேரரசன், மரண மாஸ்டர், பாதாளப் போராட்டம் நடத்திய மிஸ்டர் நெமோ, ராட்சச குள்ளன், டாக்டர் ஆர்கோ, சைத்தான் புரபெஸ்ஸர், விண்வெளி பிசாசு, கோப்ரா தீவின் விந்தைகள், சிவப்பு தளபதி, இப்படி கூறிக் கொண்டே போகலாம்.

ஆனால் இவை அனைத்துக்கும் உயர்ந்த கதைகள் என்றால் இரண்டே இரண்டு மட்டும் நினைவில் வருகின்றன. ஒன்று: நீதிக் காவலன் ஸ்பைடர். இந்த கதையில் தான் குற்ற உலகின் அனைத்து கிரிமினல்களும் ஒன்றாக இணைந்து ஸ்பைடருக்கு எதிராக இணைந்து ஒரு மாபெரும் எதிரியை உருவாக்குகின்றனர்.

ஸ்பைடாரே தோற்றுப் போகும் ஒரு சூழ்நிலை ஏற்படுவது இந்த கதையில் தான். ஆனால் தன்னுடைய மதி நுட்பத்தால் ஸ்பைடர் இந்த எதிரியை வென்று வருவதோடில்லாமல் நீதிக் காவலனாக வேறு மாறி விடுகிறான். அதனால் தான் இந்த கதை மிகவும் சிறப்பு பெற்றதாக இருக்கிறது. இரண்டாவது கதையை பற்றி தனி பதிவாக இடுகிறேன்.

சமீபத்தில் இல்வாழ்க்கை பந்தத்தில் இணைந்த நண்பர் அய்யம்பாளையம் அவர்களுக்கு வாழ்த்துக்களை இங்கே தெரிவித்துக் கொள்கிறேன். நண்பரே, உமக்கு என்னுடைய தனிப் பட்ட வாழ்த்துக்கள்.